نهى محمد الربيع
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

الشاعر يوسف حمد حفيد احمد عوض الكريم ابو سن

اذهب الى الأسفل

  الشاعر يوسف حمد حفيد احمد عوض الكريم ابو سن Empty الشاعر يوسف حمد حفيد احمد عوض الكريم ابو سن

مُساهمة  Admin الخميس أكتوبر 04, 2012 7:20 am

معنا اليوم ضيوف اعزاء من ارض البطانة منطقة ام رويشد وحلفا الجديدة القرية 6 عرب عريضة الشكرية ومدينة رفاعة التى ضمت الى ارض البطانة عام 1790م ما تعادل 1206هـ عن طريق قبيلة الشكرية من السلطنة الزرقاء بقيادة حفيد المذكور المواطن المجاهد الشاعر يوسف حمد يوسف حمد عوض الكريم ابو سن ابن على ابن محمد الاريغن ود عدلان ود نايل ود الشيخ شاع الدين ود التويم المولود سنة 1550م ود ام بشر ود احمد شوم الى زيدان ود شكير ابن عبد الله الجواد ابن سيدنا جعفر الطيار ابن عم الرسول محمد صلى الله عليه وسلم من السيدة فاطمة بنت الامام الحسين بن على كرم الله وجهه فضيلة الطير والدته امنه النور بنت قيامة فضيلة الطير كناية للشجاعة والكرم
س: حدثنا عن تراث الشكرية؟
ج: شاعر الشكرية يقول:
شكرياً عزيز ود الفحول القرح
بلوم المر وفوق غلبو الشديد بطرح
شايل هم قبايل للمساكين فرح
اصلاً ما برد من التقيلة وسرح
وهذه القصيدة التى ذكرت انفا فى مجد قبيلة الشكرية فى شخص ناظرهم محمد حمد ابو سن المتوفى سنة 1987-1988م وهو عمى اخو الوالد ابن عمه... وهذه القبيلة منذ اكثر من خمسمائة عام وضعت يدها ودخلت فى حرب ضد السلطنة الزرقاء(مملكة سنار) الى ان نالت الوثيقة من السلطان بادى ود دكين اخر ملوك مملكة سنار فى عام 1790م وكانت انذاك لها حدود الحمرة دقين جنوبا (ارض الحبش) وشمالا ارض الجعليين (الولى الصالح الشيخ على ابو دليق) غربا بحر العاديك وشرقا بحر اتبرة فى ذلك التاريخ حيث قال شاعرهم:
راحلين نازلين من خمسمية عام
جباهنا تخر دما وضاربات قلوبنا سهام
دايرين نستقر فى الابتراوى عظام
وكانت فى زيارة عبود بعد تهجير الحلفاويين الى ارض البطانة من حلفا القديمة ... وفى التركية السابقة بتاريخ 1860م كان لابناء الشكرية ابن عظيم الشاعر الحاكم احمد بك عوض الكريم ابو سن وهو اول مدير على الخرطوم وسنار من ابناء الشكرية وهو جد ضيفنا يوسف حمد يوسف حمد عوض الكريم احمد بك ابو سن الذى يدرس فى تاريخ الصف الثامن وربما فى الجامعات والمعاهد العليا الذى توفى بمصر بمقابر الامام الشاقعى بعد حكمه الذى دام عشرة سنوات للسودان 1870م وهذه المقابر توجد فيها حبوبته الشريفية السيدة فاطمة بنت الامام الحسين رضى الله عنه ووالدته التايه بنت الشيخ يوسف ابو شره شيخ سجادة العركيين والقاضى الشرعى لحكومة سنار
س: عمك احمد عوض الكريم ابوسن احكى لنا عنه؟
ج: قال فى شخصي شعر عام 1985م حيث قدومى من مكه المكرمة ومن منطقة المفاذة ولاية القضارف وقد احضرت له هديه ساعتها من ابناء اخية على ود الهد ود الشيخ عوض الكريم ابو هلبه ابو سن قال:
يوسف جانى من اهل الكرم والعز
فرسان المحاص بعد النحاس ما يرز
اولاد الهد على البدى السراتو تنز
غير الجودة لا بعرف الحليب لا بجز
وقال فى الصلاة:
ال لحماك تنومى وما رقد خلالك
يجد فى الدنيا خير والرحمة ترجا هناك
رحمة عالم السر الرفع مثواك
تخشينا وتعمى العالم التابعاك
من الله ورسول الله العظيم جيناك
يا جنة عدن والخلد ناكل فيك ونشرب ماك
وقد مشيت مع عمى كثيرا فى السفر لاذاعة امدرمان ولمناطق شمال السودان منطقة قوز الفونج بالدامر التى فيها صديقه حسين قراشي من قبيلة القراريش وكان يحترمنى كثيرا وكنت ساعتها طالب فى العلم ومن اوائل دفعتى وبعد ذهابى الى مكة المكرمة 1984-1985م وبعد وفاة والدى حمد يوسف حمد ابو سن طلب اليّ عمى ان اتزوج وتزوجت من قبيلة الشكرية فرع النهيدات والحمد لله لى من الابناء والبنات منهم من امتحن للجامعات ومنهم من تزوج وهذا كان بفضله لوقوفه معى لانه اكبر من الوالد باربعه عشر عاما والدى توفى عام 1979م
س: حدثنا عن الشاعر الصادق ود حمد ود الحلال الشكرى؟
ج: هو شكرى وقد قابلته كثيرا وقد قال فى الفروسية:
تماسيح ام رهو القلعن قبل سيدون
الموت فى ام هبج زادن سماحه ولون
جيد اولاد ابوى ما دارو فزعة وعون
اب عشرة وسيوفن فى المحاصة درون
وفى الغزل قال:
الصلطلى مقطوع النصيب غشانى
اموت بى غلبى كان ما اعود واشوفك تانى
بعد التوبة والشيب والكبر دبانى
سم العقرب الحارم عقب شعانى
اما فى اب على ود امحمد ود عدلان جد الشكرية الاوسط فقال فيه الشاعر ابو دقينه ود ابقلبوس ود نايل:
دى بطانة اب على الذكرت نقايبو عظيمة
ان جار جار سرور وان مدا إيدو هجيمة
جميعت الخاصمو وورثوا لفنا لا ديمة
بردته وبقت لى من بدورها طميمة
كضباً راح صحا جلى وسطنتو يا قاعدين شكر اب على
قلم حديد الريف فوق التلى
وجدع علوج دارفور عند الخلى
قال احد شعراء الشكرية:
حسان واب على واب سن حدار الجار
كاتلين عز مكوك كم بردوها الدار
من الهايكوته لا البلد اب قنن صُفار
ما خلوها نيتا تنقلب لى النار
والان بتاريخ2010م البطانة جابت الدهب الصافى المجمر وزارنا فيها رئيس جمهورية السودان السيد البشير فى محلية السباق وانا من قبل الزيارة هذه كنت فى العمليات فى مناطق غرب الاستوائية جوبا وانشدت قائلا:
من ابيي ولا هجليج مرور بتلودى
اخوان عزة فيك ما كترو البارودى
قدر ما نفقول غرستى بالرجال بتجودى
عمرا ليك مقنب يا ليالى سعودى
اخرجتى الدهب من نعمة المحمودى
يا ارض البطانة الفيكي خير بتجودى
س: دعنا نتحدث عن المسارير؟
ج: كتبت فى الكثير من الكتب واستحضر الاتى:
هذا جزء من مسدار عمى احمد عوض الكريم ابو سن
اداك شجر ام هشيمة ال ليكا طار واتسادا
با الجرت حسكتك ليكا بقيت عادة
ظبية عنز الريل الورودن مادا
خلت كور شديدك من رحيلك نادا

قطع خور العطاش جاك الدموك واتقافف
خلت جلدو من حر الشقيق اترافف
المهرودة كبدو وبالشيوم ممكون
قطعت اب قَِرف نجع يا الجم قماقمك سال
وينك ووين فلانه ام برطمن عسال
جزمت الليلة كان ما تبقى حال دون حال
مساك مع الطرايد يا ام جزاما جال
ويقول الشاعر محلق الذى ينتمى لقبيلة الشكرية كما قال النسّابة حسان ود دراج ام الصغير ود اب سن ان محلق من جنى كندير الاحمر نوايمه من فرع الشكرية – قال:
وامك بتلده الصيد سمح القلادة
شعرا برا دايوك عنف الوسادة
وسنا بلا مسواك برق المكادة
الناس بتلده الناس ساكت حمير
وامك بتلده الصيد سمح الضمير
شعرا بلا دايوك عنف السرير
وسنا بلا مسواك برقا بشيل
س: هذا الشاعر يكتب فى تاجوج بنت على اخبرنا عن هذه؟
ج: قيل عنها انها قبل 300عام تقريبا فى فترة الشيخ عوض الكريم ابو على جد اب سن ود على زعيم الشكرية لانو محلق قال:
بشد واركب على ود البشارى
بليد نوراب شليخ الليلة طارى
فريخه لى اب على الضام الشكارى
وربما هذا كان سبب الطلاق من تاجوج ويقال ان ابله ضاعت وذهب الى (ست ودع)فاخبرته بعلامة فى زوجته تاجوج بت على واذا وجد العلامة سيجد ابله حسب قول الوداعية وكذب المنجمون ولو صدقوا
-ومن شعراء البطانة الشاعر ود رانفى العيشابى اخوال اب سن ود على زعيم الشكرية جد ضيفنا اليوم وقال:
انبسطت بطانة اب سن وشبعت ضان
وكراب الاخيرش فضّ فى الرويان
ام بورا كست وادلن الوديان
وفى حلفا المتلف لككو البركان
-ومن شعراء البطانة ايضا عبد القادر ابو دقينة الذى قال فى فرسان البطانة:
اولاد اب على ود امحمد ود عدلان ود نايل
رانفى البسوق بقر التلى المظابط
طوم نان دار ابوه وضوء الفريق الهابط
ان وردن بيسقيهن شرابا ثابت
وان سدرن بتلقاه فى العجاج الرابط
وقال فى حسان ود اب على:
حسان يا ود حرتى قولى البجيبو عليك من سرتى
سكاهم براد لا حفيرات الكرتى
وحفيرات الكرتى هذه معركة بين الشكرية والفونج والهمج بقيادة حسان ود اب على ود امحمد عم اب سن ود على زعيم الشكرية..
وهذا الشاعر قال فى على ود اب على ود امحمد والد عوض الكريم ابو سن والد احمد بك ابو سن الذى له شارع باسمه فى العاصمة الخرطوم شرق القصر الجمهورى ويتجه من الجنوب الى الشمال الى ان تعترضه السكة حديد
قال :
على ي ا التدخل الهرف الدريكة
ادرا قبل كركير عفن ال لجيكا
وقمر عشرة وفديك لى البالو فيكا
وقال احمد بك ابو سن (وقد حفظت هذه من شخص)
المال سدر ليهو دنابى
معاهو العركى ونايلابى
معاهو الاصطى جبل تابى
ومعاهو ا لبى الشين ما بعابى
انا مانى رخيص انا نواربى
وما باكل قرص الدابى
وهذا يدل على تعليم احمد ود اب سن مدير السودان فى الفترة 1860-1870م
واحمد ابو سن قال فيه الشاعر احمد عوض الكريم حمد ابو سن
مديرا طبعوا لى كل القبايل كافل
سديد رايا كمان شكريتو خيرهم رافل
بملكو وغصب صدر الحصان الحافل
حدودو مع الحبش لا اولاد جعل بالسافل
وقال ابنه الحاردلو:
من بيلا الصباح اسربقن همال
الدوف فوق حقايبن كترتو جمال
البلد العطش مدروك ماهو من حر النهار بكمال
وصلن ود دعول بجرن شفاقة عُدال
وقلت ام القرود وردنو من قبال
خلكن كيف برمولهن دمير حبال
وجاء من بعده ود اخوه احمد عوض الكريم حمد ابو سن
قال:
سمسم واب سبيك جبل الصعيد عفار
فيهو مصيفات معز الخلا النُفار
اب شُحيط مطر جنو التيوس طُفار
رجعن للدمير برحمه الغفار
س: كلمة اخيرة:
ج: طالما اخر القصيدة كان الغفار اشكر كل من يقرا هذا الحوار
واشكر بتنا نهى الربيع




Admin
Admin
Admin

المساهمات : 101
تاريخ التسجيل : 15/03/2011

https://nohaa.yoo7.com

الرجوع الى أعلى الصفحة اذهب الى الأسفل

الرجوع الى أعلى الصفحة

- مواضيع مماثلة

 
صلاحيات هذا المنتدى:
لاتستطيع الرد على المواضيع في هذا المنتدى