الراحل المقيم حسن الزبير بعيون ابنته

استعرض الموضوع السابق استعرض الموضوع التالي اذهب الى الأسفل

الراحل المقيم حسن الزبير بعيون ابنته

مُساهمة  Admin في الأربعاء أكتوبر 10, 2012 7:21 am

ابنه المرحوم حسن الزبير:سلمى حسن محمد الزبير خريجة تغذية صحية وعلاجية جامعة الخرطوم.
س: ماذا عن حسن الزبير الوالد؟
ج: الوالد كان صديق لنا جميعا وله عشرة من الابناء والبنات وجميعهم خريجين من الجامعات والمعاهد العليا
س: حدثينا عن حسن الزبير الشاعر؟
ج: اذكر انه كان يكتب عن مواقف تمر به او باصدقائه مثل قصيدة القيامة وهى حدثت لاحد اصحابه الذى طلب منه ان يتقدم لخطبة زميلتهم وكانت مرتبطة فضرب الطاولة بيده قائلا ان شاء الله القيامة تقوم وكان مولد القصيدة...
انشاء الله القيامـــة تقــــــــــوم عشان ريدك معاى ما بـدوم
ناس سهـــــــرانـــــا طـــوالى وناس طول الليــــالى تنـــوم
اشوف انا كيف حسابك يطول على الوعد الـدوام ممطــول
وانا الشايف كتير احبــــــــاب بعيشو الريدة عرض وطول
انا الشــــــــايل دوام همــــــك اريـــدك ريـــــده ذى امـــك
واغير من غيرتى ذاتا عليــك اخاف انــا يا الخفيف دمـــك
انشــــا الله القيامــــــة تقـــــوم وكـل زول يمشي فى حـــالو
عشان ما قلبي يرجع يقـــــول حبيب الدنيـــــا فى بــــــــالو
ورد عليه صديقه الدكتــــــور احمد فرح شــــادول قائـــلاً:
انشا الله الحســــــادة تطيـــــر وايـــــام السعــــادة تـــــدوم
والضاق الحـــزن فى الريــــد بكرة يعيش ويشبع نــــــــوم
بتدور القيامة تقوم عشـــــان حظك شقــــى ومشئـــــــوم
وفتحن ليك بنات حـــــــــــواء وجافاك ليلة واحـدة النــــوم
بس داير القيامــــة تقـــــــــوم
نحن ولا عرفنــــــــا جديــــــد ولا زيــــك عشقنـــا الغيــد
وحبيبنـــــا القريب وبعيــــــــد ولا ضمانا حضن الليــــــل
مع الوجـــــه البهى وغريـــــد
ولا لليـــــــــل شكينــــا حبيب اذا حتى العشقنــــــا عنيــــد
ولا لينـــــا ابن عـــــوف غنى لا الصابـــــر ولا البــــاكى
خيــالك عنـــــدى يـــــومــاتى صباح خيرى ومسا افراحى
اعــــد ميعـــادوا باللحظــــات وسهرى معــــاه صبــــاحى
عيـونك فــوق عيــونى تنـــوم وفـــوق الامى تـــرتــــاحى
وريـــدك من عــواتى الريـــح المو واضــم على جنـــاحى
وتقــــول القيــــامة تقـــــوم
نحـــن مع السعــــادة نسيـــــر موكب فرحه هادره هديـــر
ناكل حب ونشرب حب ونلبس حب نسو جنحين محبة نطير
نعيش الدنيا عرض وطــول كبيرنا ملك صغيرنا امير
وتسمع صوت هتافنا يجيـك ان شاء الله الحسادة تطير
وتكبر وتنسي يا زغبير
وقال الراحل حسن الزبير فى (القيامة2)
ان شاء الله القيامة تقــــوم وعشمى فى الله ما شويــــة
ادخـل جنـــــــة المــــأوى وهناك يـــــدونى حوريــــة
اتكى فى الارائـــــك انـوم بكـــــل حبــــــور وحريـــة
ارتاح من دا ما فى وقــوم وامشى جيب لى وجيب ليا
افـــــــارق دنية المعـــدوم والقى مطـــــالبى بالنيــــــه
ولو حنيت لى لحم الطيــر تجينى الطيرة مشويـــــــــة
عشانك كية يـــــا دكتـــور تكون حــــوريتى خمريــــة
يجرجر ديسها دا المـردوم ولهجتها خالصــــة عربيـــة
اخلى ليك بنات حـــــــواء تحاحى صباح وعصريــــة
وتبقى عواطلى يــا دكتور هناك لامرض ولا شكيــــة
هنـــــــاك ولا اذن سمعت ولا بعيونـــــــــا مرئيـــــــة
جداول من عسل مشنــون هناك كل حاجـــة اصليــــــة
ولا عشوائي فى خرطـوم ولا نفحـــــــــات سموميــــة
هناك حتى الرحيق مختوم هناك لا قروش ولا ماهيــــة
صفى النيه يـــا مهجـــــوم بلاش هجمــــات هبوبيــــــة
وان شاء الله القيامة تقــوم وتنجح ميــــــــة فى الميـــة
س: انتم مقلون فى الحديث للصحف ووسائل الاعلام هل هو غرور؟
ج: لا ليس غرورا لان الوالد ملك للشعب السودانى ولم يحدث ان يحضر صحفى ويطلب معلومة ونرفض الادلاء اليه
س: ما هى القصيدة التى تنال اعجابك من اعمال الوالد؟
ج: كل اعماله تنال اعجابى ولكن تعجبنى اكثر قصيدة الصبوحة التى كتبها عنى وموجودة فى ديوانه ما بنختلف
يا الصبوحة يا الحنيـــــــه الحلــــــــــوه روحهــــــــا
وفى عيونها اخدت روحه
يا جبين رسموه لوحــــــه وصفحة الخد البلوحــــــــة
مافى فى السكر ملوحــــة ومافى توبة حب نصوحـة
جـــات بعـــد جفت سنيني والزمان المـــــا بيرحـــــم
خط سطــــرين فى جبيني
جــــاتنى تاخــد بى يمينى وهى الوحيدة المالية عيني
وهى فوق لى كل حاجـــة فوق مسادير الاغــــــــانى
وفوق مفاهيم السذاجــــــة
يــــا زمن فردوسي خالد لسه لا اتعاش ولا جـــا
يا فهم كمل فهمنــــــــــــا ويا نغم خاتى اللجاجـــة
س:اذكرى لنا صفات المرحوم حسن الزبير ؟
ج: متسامح ومتواضع ومحب للناس ويحب ان يصلح بين الجميع وكريم
كلمة المحررة:
التحية للاسرة الكريمة السيدة الفاضلة نعمات زوجة الشاعر حسن الزبير والاخت سلمى ورحمه الله يقدر ما قدم لاهل السودان.

k،،،

نهى الربيع

avatar
Admin
Admin

المساهمات : 101
تاريخ التسجيل : 15/03/2011

http://nohaa.yoo7.com

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى