دكشنرى ........................

دكشنرى
انه اسم يعرفه كل محبى فن الحقيبة والفن التراثى فى الازاعة السودانية اذ انه مصدر للمعلومة ومن هنا كانت تسميته دكشنرى انه الاستاذ على مصطفى احمد ركاب فلنتعرف اليه عن قرب
ٍ _على مصطفى من مواليد قرية الركيب شرق ود راوة عام 1953 اعمل الان بالمكتبة الصوتية بالازاعة السودانية
س: ماذا عن التسميه ؟
دكشنرى اسم اطلقه على الفنان الرائع القلع عبد الحفيظ وابراهيم خوجلى يطلق علىا( موسوعة الفن ) اما الفرجونى والجقر ف( الكتاب الاخدر والاصفر) لان كتب زمان القديمة التى تحمل المعلومة كانت صفراء وخضراء .
س: ما هى علاقتك بالحقيبة ولماذا هذا الحب ؟
علاقتى مع الحقيبة كانت من خلال الثنائى ميرغنى المامون واحمد حسن جمعة وكنت محبا لصوتهما ومن خلال هولاء عشقت الحقيبة ووجدت نفسى احفظ كل اغانيهم ثم تطور الامر الى اغانى الحقيبة واصبحت معرفتى وثيقة بغالبية فنانى الحقيبة امثال عوض وابراهيم شمبات و اولاد الموردة والفنان بادى وقيقم و احمد يوسف و محمود بخيت الخ .....ايضا لى معرفة وثيقة بكل المهتمين بالحقيبة امثال عوض بابكر و الجقر وغيرهم.
س: حدثنا عن الاسطوانات ؟
- بدات فى العشرينات واول فنان سودانى سجل لشركة بيضفون هو الفنان بشير الرباطابى ...و اول اغنية سجلها (عشوق جنابن) و اغنية (حليل موسى) ولكن قام شعراء الحقيبة بمجاراة اللحن واول شاعر جاراها هو ود الرضى باغنية (حليل امنة) والعبادى باغنية (حليل شامة) والمساح باغنية (حليل اسيا) وبعد ذلك الفنان الذى سجل اسطوانات من اغنيات الحقيبة هو فنان البجراوية عبدالله الماحى وبعد ذلك شركة اوديون واول من سجل لها كرومة وحدباى وعبد العزيز مصطفى واشهر الاغنيات زهر الرياض فى غصونو ماح لكرومة من كلمات حدباى و حدباى (فوق جناين الشاطى) لخليل فرح وعبد العزيز مصطفى تغنى ب(ليك سلامى يا ام در امان)للعبادى ...ثم بعد ذلك سافر الرباعى الشهير عمر البنا و على الشايقى و محمد الامين بادى و التوم عبد الجليل وسجلوا بعض الاغنيات لابو صلاح اشهرهم (وصف الخنتيلة) لعمر البنا و (من مناظر الحفلة الجميلة) لعلى الشايقى .....(ليلى طال) لمحمد الامين بادى و (القمرى المظلل)للتوم عبد الجليل ...واستمرت الاسطوانات حتى 31 وسافر عميد الفن السودانى محمد احمد سرور والامين عثمان برهان و كرومة وسجلوا بعض الاغنيات للعبادى (سجل سرور و برهان اما كرومة كورس) واشهر تلك الاغنيات (برضى ليك المولى الموالى) و الامين برهان سجل اشهر الاغنيات لسيد عبد العزيز (الجنان فى الدنيا) و ( عقلى انشغل بهواك ) لمصطفى بطران
-

- س: من هم اشهر شعراء الحقيبة الذين تذكرهم ؟
- العبادى ,ابو صلاح ,ود الرضى ’عبيد عبد الرحمن ,سيد عبد العزيز ، عبد الرحيم العمري ، محمد علي عثمان بدري ، يوسف حسب الله سلطان العاشقين ، عتيق ، عبدالرحمن الريح ، علي عثمان التنقاري .
س : فن الحقيبة خالد رغم مرور السنين ما سبب ذلك ؟
- شعر الحقيبة منظوم نظم قوى ورقيق وهم تأثروا بالشعر الجاهلي وشعر الصوفية وكانوا ملتزمين
- س : ماذا عن الفترة قبل شعر الحقيبة ؟
- بدت بالدوبيت والمربعات والمسادير والشكر .. والشعراء اشهرهم حامد عثمان ومحمد الكيلك ثم تدرج الشعر حتى جاء شعر الطمبره وكان اشهر الشعراء من منطقة البجراوية وهو الحسن ود سالم وود بعشوم وبشير الطاش ومحمد ود عبدالله وهؤلاء كتبو شعر الطمبره وأعطوه محمد ود الفكي وهو الذي نشر الفن في امدرمان وبعد ذلك ابتداء العبادي مع سرور في عام1916 وفى عام 1919اختلف الطنابرة مع سرور واقسم سرور بعمل فن ينهي الطنابرة وهذا كان فى زواج بشير الشيخ وقام سرور بعمل نقلة من اغنية الطنابرة الى اغنية الحقيبة ..و اول اغنية كتبها العبادى (ببكي وبنوح وبصيح) وود الرضي كتب( مر يا نسيم ) وابو صلاح كتب ( فريع البانة ) وبعد ذلك أعجب الجميع في امدرمان بفن سرور وكان ذلك بداية الاغنية الحديثة فسرور ادخل الرق عن الطريقة الاحمدية ودخل الصاجات عن الطريقة القادرية وادخل العود عن اولاد بنى بالمسالمة وادخل الكمان عن طريق السر عبد الله وظهر معه في فترته الامين برهان وفي سنة 22 ظهر كرومة وكان مقلداً لسرور وفي عهده ظهر عبد العزيز المأمون الشقيق الاكبر لمرغني المأمون وظهر عمر البنا ومحمد الامين بادي وعلي الشايقي والتوم عبدالجليل (كمغنيين لشعر ابو صلاح) وهذا الذي جعل فن المجاراة والمنافسة القوية
س:ماذا تقصد بالمجاراة ؟؟
- اللحن زمان كان يسمى الرواية فسرور عمل رواية لاغنية ابو صلاح فريع البانة وعندما احضرها لعلى الشايقى وعمر البنا رفضوا ان يغنوها لان سرور غناها فقالوا لبو صلاح جاري لنا الروية فعمل لهم ( ان ورد بروايحك نسام) التي هذا بعضها :
ان ورد بروايحك نسام
تنتعش ارواحاً ياليلي واجسام
قلبي بما تهوي ترجام
اوعا حاسبي قلبي المنجام
تكسريهو ويدفق دمعي الحقن جام
وتم غناء الاغنية من قبل عمر البنا و على الشايقى .اما اغنية ببكى وبنوح وبصيح من كلمات العبادى جاراها ابو صلاح باغنية وسطا ضمر واتهادا ..
س: احكى لنا عن قصة امير الشعراء احمد شوقى مع الفنان والشاعر عمر البنا
_عندما سافر عمر البنا و على الشايقى و محمد الامين بادى و التوم عبد الجليل كان سفرهم مع التاجر محمد داؤد حسين وصادفهم في مصر سوداني قال لمحمد داؤد حسين عندنا جلسة فيها أمير الشعراء احمد شوقي ارجوا حضوركم جميعاً وفعلاً حضرو الجلسة وغنو فيها واخر واحد تغنى كان علي الشايقي بأغنية (جافى المنام لاسعني حي ) وكانت بتصغير الكلمات فاعجب بها احمد شوقي وكان كلما قال كوبليه يطلب منه أعادته وبعد ان انتهت الاغنية سأله عن صاحبها فأجابه علي الشايقي انها لابو صلاح فاحضر احمد شوقي ديوانه وكتب عليه ( هدي صافية من وجداني من أكبر شاعر مصري الي اكبر شاعر سوداني ) وبعد ان وصل عمر البنا وعلي الشايقي السودان أعطوا ديوان احمد شوقي الي ابو صلاح ، فأجتمع كل شعراء الحقيبة وقالو ان ابوصلاح اخذ عليهم القوسية والقوسية هي اكبر درجة في الصوفية وأعترفوا كلهم بابو صلاح .
س : النساء هل كان لهن مكان في فن الحقيبة ؟
- سجلت أم الحسن الشايقية اغنية من جبيت بدري لابو صلاح و البريق العاتم سماهو لود الرضي وفي الضواحي وطرف المدائن لخليل فرح ، ايضاً من النساء الغنن الغناء القديم ميري والجنه حمد والانسة فضيل الله .
- المحرر:
- الاستاذ علي مصطفى هو فعلاً دكشنري أذ أنه يملك معلومات ثره في كل مايتعلق بالحقيبة ولكن لضيق الوقت اختصرنا هذه الونسة المفيدة معه وكلنا سوف نكون في انتظار كتابه الذي سوف يصدر قريباً وستقوم به منظمة شابا .
وعمنا هذا امتحن الشهادة السودانية هذا العام ونجح بأمتياز وهو يحمل شهادته في يده وقال تفسيراً لذلك ان البلد ما بتقيم الفي الراس بل تقيم الورق والشهادات عندها وجدتني اختلف معه قائله : إذا كتيييييييييرة وما بتعرف زول برضو وجودها زى عدمو .....اسال بنتك دى