حاجة امنة الجموعية ( امراة من الزمن الجميل)

استعرض الموضوع السابق استعرض الموضوع التالي اذهب الى الأسفل

حاجة امنة الجموعية ( امراة من الزمن الجميل)

مُساهمة  Admin في الأحد نوفمبر 11, 2012 1:54 pm

الحاجة امنه الامين امراه سبعينية من نساء الجموعية اصبح منزلها قبلة للاصدقاء والجيران من محبين حاجة امنه التى تقول الدوبيت والشعر والمسادير رغم انها لم ترتاد المدارس ولا تعرف القراءة او الكتابة.
س:حاجة امنه ماذا تذكرى من غناكم زمان؟
ج:جملة الصالحين اهل الله
فوق زولا فويطرو مجلا
وما حامت فريق بى حلة
وما شالوها ناس خلق الله
واغنية اخرى:
يا اخوانى انا الجنيت
والعترتا ما سميت
سببى الفى العصير لاقيته
جيب ولى تراب من بيتا
س: والتراب دا عشان شنو؟
ج: يقصد ان تراب قدمها فيه علاج له (ناس زمان بقولو دى البركة)
س:الجميع يحكى عن الخاتم الذى فقدتيه عندما ذهبتى للزراعة فماذا قلتى؟
ج: تعالوا معايا يا مزارعين
على خاتمى البروح فى الطين
يا سيدى البخلق الروح
يا شفيعنا النبى الممدوح
اجمعوا خاتمى فى المشروع
ومن عين الخلوق يا نوح
ارح يا اخوانى ندلى
وبعد فتشتا فى الحلة
ودهبا داقو ود مله
وصادق صايغو خايف الله
ويا الصلاح يا الفلاح
يا اهل الاية والاصلاح
شدو خيولكم القراح
عليكم لومى خاتمى الراح
الادريسى العظيم شانو
وراجلا عالى برهانو
خاتمى الصافى ميزانو
دهب ود ملة ما خانو
وبنده ليك رجال ياسين
يا الريح مع التسعين
خاتمى الداقا المسكين
ومن ود مله دهبو متين
يا الحيين ويا الميتين
يا اهل اللوح مع الدارسين
يا ود مله شمس الدين
خاتم الوالده راح فى الطين
الشيخ البرعى قاعد وين؟؟؟؟؟؟؟؟؟؟
انادى القرشى ود الزين
شيلو الفاتحة يا سمحين
يا اهل الصلاح والدين
يا الكواهلة و يا العركيين
يا الغبش اب حراز بينين
يا يابا الفكى الامين
يا حسن السلاحو سنين
يا الحيين و يا الميتين

وين ناس الخضر والياس؟؟؟
اهل الاسم والاخلاص
قومو معاى سريع يا ناس
وقصة خاتمى تبقى وراث
مرحب حمزه والعباس
يا الكرار عقيد الراس
احمد ربى يا فراس
وبالخاتم جمعتا خلاس
بهدى صلاتى بالالاف
لا تعداد ولا تنشاف
تنجى الامة كلها كاف
تلازم بابا بالاشراف
س:
نحمد الله انو الحاجة وجدت الخاتم الذى ضاع فى الزراعة وعرفت انها كانت مريضة قبل فترة ولازمت مستشفى سوبا وعندما رات الاطباء كتبت عن الجامعات اذ ان التعليم نال اعجابها ماذا قلتى يا خالة امنه؟
ج: شكرا للجامعة الف مشكور
وخطك بالقلم واضح جميل مشهور
حاليه الجامعة ودايما تكون فى سرور
الطالب منها يتخرج نبيه دكتور
السودان جميع اتفقو تمو الشورة
ما عملو الكعب واجبا صحيح قضولا
رسمو عنابرا المريخ مرق الكوره
درسو الطب تمام بالساعة والسبورة

الدكتور ديمة على كرسيه محضر
ومن نادا الممرض جاو سريع واستعجل
كتبولو الاورنيك القلمو صاح مسطر
قدامو السرير مفروش نظامو معدل
اولادى الهمام مافيهم البتاخر
سوبا يا نعم مستشفاها عالية نقابتا ودكاترتا الخداماها
السودان عزيزة ما اصلو سواها
ودى جنة نعيم معدوم نظيرا براها
الصلاة والسلام من امنه لى مولاها
عد ما فى الارض وطرحة رفعو سماها
تنجى المسلمين ما تخلى حد بى وراها
وتحفظ الجامعات بى معلميها بى غفراها
المحرر:-
حاجة امنه تحفظ الكثير من الاشعار والدوبيت والمسادير،زوجت الابناء والبنات ومنزلها قبله اليوم لكل محبى التراث السودانى ربنا اديها الصحة والعافية
avatar
Admin
Admin

المساهمات : 101
تاريخ التسجيل : 15/03/2011

http://nohaa.yoo7.com

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى