مربعات .. دوبيت... مسادير... تراث (دار الهواوير)

من شعراء الدوبيت الاستاذ محمد حماد الهوارى من قبيلة الهواوير
س: نبدأ معه بمربعات عن القبيلة
ج:انحنا الفى القبائل راسنا فوق مرفوع
انحنا اسمنا فى التاريخ قديم مطبوع
نحنا خصمنا من النوم بقوم مخلوع
نحنا اميرنا راكز الغربى لا ابو ضلوع
رباعية اخرى
اولاد الهواوير احنا عشرة فروع
نحنا المونة فى زمن الجفاف والجوع
البنقولو بالرضى والغصب مسموع
كم فى الدنيا بكينا ومسحنا دموع
رباعية اخرى
نحنا اللينا تاريخا قديم معروف
نحنا ا نجيتنا مظلوم ما بتصد مكسوف
انحنا اللى رفيقنا قلبنا ديما عطوف
انحنا كرمنا نوق ما داب سخيل خروف
مربوع اخر
ما بنغدر خصيمنا نجيهو بى المكشوف
كينا زاتو دون الكى نجيض مخلوف
كم بى عصانا قاومنا الكلاشنكوف
وكم كم نحنا جايبين النهب مكتوف
رباعية اخرى
فى الغرب نحنا سوق الدبة اشهد لينا
انحنا الفى الكماج تشهد علينا محينا
طيبين نحنا وكت بى بساطة تجينا
وحوش تلقانا كان سويت معانا الشينة
س: الاستاذ الهوارى نحنا سمعنا بقصة العملية احكى للقراء عنها؟
ج: قبل سنوات قابلنى الاستاذ حسن حسون فى احدى المستشفيات وكان هنالك دكتورة شغلت الجميع بجمالها وكان التعليق عنها من الجميع وفى اليوم التالى اصبت بالم واجريت لى عملية زائدة وزارنى بالمستشفى عدد من كتاب الدوبيت ومنهم زميلى حسن حسون الذى اعطانى مربوع فى ورقة صغيرة وقال لى(اصرف الرشتة دى) وكان مكتوب فيها:
تحلو معاك القعدة وتطول لى حول
ود حماد اخوى والله ما فيك قول
سيرتك بيها نفرح وكل همومنا تزول
غيابك قاسى بيك صبح الفكر مشغول
وكان ردى كالاتى:
تحلالكم سعادة الدنيا ربى بقول
كل واحد يعيش فى سعادة مو مزلول
طيبين انتو والفى منكم مشيول
وبوجودكم يصير كل الالم مزيول


تحلا القعدة دايما بى حلات الفيها
كل واحد بقول الكلمة ما بضاريها
يا البيكم سعادتى وحزنتى المابيها
فيكم جد لقيت الطيبة من كل جيهة

الخوف البخافو بخاف تقولو هوين
بخاف الحسرة والندم البعد ما تزين
يا الحسنين وفتحى الجاك ازاى مو بين
ازاى المن صغير قايم مفدع ولين

بوريكم غيابى المافى منو مدسة
غبت انا اصلى مجروح من سهام مترصة
منى صرفتا عشرين والاخير اتقسا
صرفتو وشال يمين منو الرقيدة ال لسه

فكركم ديمة مشغول بالذكر يا قصة
الا انا فكرى شالتو الطالعة من الحصة
وكت بسمت معاى وشفتا السنون مترصة
اوريكم حسن حسون دا حاضر القصة

ومن صابنى السهم يا حسين صبحتا مالم
طبيعتى سكوت كتير بى البى ما بتكلم
واحدين قالوا عين وال لى بقول ما بسلم
ما عارفين سهام عين الغزال ما بترحم

جا الدكتور شخص لينا قال دى الزايدة
سرعة تدخلو العملية لى تاخيرنا ما فيش فائدة
فى التخدير هناك دكتورة اسمها عايدة
معاى تبسم تبسما مو تبسم رايدة

والعملية طلعت حاجة مى معروفة
ما ورونا بل ما خلو واحد يشوفا
سهام عينيها يا خلايا منها خوفة
غور فى الضمير بى ضلوعى ماخد طوفة

يا فتحى المغرب روحى ليهو سنين
سهامو بترمى من قبال تشوفو العين
يا الحيرتى عقلى وشلتى قلبى فطين

رفعتا قضيتى للشعراء الحسن و حسين
وبديكم وصف من الرمنى سهامو
عقرت حواء ما اظن يوم تلد قدامو
كترت اهتى كان يوم اشفى من الاما
حاولت الرقاد بغمد بشوف الشامة

ترسل لى سلاما تقول نعلك طيب
انا كيفن اطيب من المنو الطبيب مو طيب
يا الفاتن الشباب فيك الصغير والشيب
اسمعى بلى اضانك عمرى حدو قريب
س: وماذا قال محمد الهوارى عن بنات حواء؟
ج: الفى قلوبنا مصوب صبة
عالية اردافو شال نومنا الجعل ما يربى
الما بين دلع امو ابوهو اتربى
اسموا اغلى المعادن ومنو تغنيك حبة

عشوقى الحبو ازمن فى دواخلى مخبى
كل ما يلفح التوب جمرو ياخد شبة
الخلانى بالاهات فؤادى معبى
بعدا عنو اول.. وتانى شوق محبة

حريف تنشين وليا موجه النشاب
وكم بى لحظو ودر غيرى جرح وصاب
وكتين بالبرد عضت على العناب
الله يسامحو فى عقولنا الخربها خراب

س: شاعر الدوبيت محمد الهوارى لك الشكر الجزيل وماذا تود ان تقول فى كلمة اخيرة؟
ج:يا بت الربيع جيتك يمين سرتنا
فى دار الهواوير تكتمل فرحتنا
نحنا الفى القبايل تعتبر كلمتنا
زى سيف الامير وقتين يقولو الفتنة