كاتب الدوبيت ابو حميدة (تراث القريات)

بياع القريات منطقة تم تسميتها باسم قبيلة ناظرها مجدد على مجدد ومنطقتهم الاساسية ام حروت الريف الغربى وهم اناث بدو ورعاة اما القرية فتابعة لمحلية كررى.. لهم تراث فى الشعر والدوبيت والدلوكة والفن بانواعه وفى معيتنا شاعر من هذه المنطقة
الشاعر ابو حميدة مجدد صالح ساعد نرحب به معنا اليوم وفى البداية نقول له
س: الابل فى السودان مصدر فخر فى القبيلة ماذا تقول عنها ؟
ج:شديت العصير فوق البزيم واتكرف
لاقانى الفرع مارق مرور اتشرف
اتمايح متل فرع الجنينة الخرف
اتبسم متل برق الضلمة الجرف
مربوط من قعور لامن زرقته النايب
فد يوم ما حصل واجبا لقيتك غايب
وكتين تنوى بالبيت الحجير مو شكايب
عقد رهو طرى النجعان وجنو هبايب
مربوط فى السموم تتقلى نامت العالى
من دبغ السيول الجلى
خرير دوماتو فوق وتراتو سال وادلى
ايدو تدوبن نشالا عقابو انفلا
هضليم ريع وتيمس بر
يا سابح الزرازير المحارب كر
سدرك باب وعسراتك مواركه التر
يا ساتر عليك انشاء الله ما تنضر
س:عمنا ابو حميده لكم كتابات عن بنات حواء فماذا قلتم؟
ج: الخلانى غير رمضان اصوم متطوع
ذولى النضمو راسى معايا مو متصوع
تاتاى الفلو وقدم الحمام ما ببوع
خبارو الليله دافر مركبو ومتنوع
رباعية اخرى
عودك بابنوس ساقك قلم رصاص
عينك عين جدى وباقى الجسم حساس
رب العزة خلقك بى جمالا خاص
يحفظك الله من عينى وعيون الناس
رباعية اخرى
اسمك فى الاسامى اسما ذكى مفهوم
وفيك ملامح الصيد يا القفاك مردوم
يا ست السماح الراسى مو ملخوم
واكيد الصابحك فى الدنيا مو مظلوم
رباعية اخرى
مربوعة حريم دقا سمح فى صباها
بتفك القرين يا ماشى اتغشاها
الشلاخ صدوغ الرقبت لجناها
السنام بروق الارعدت فى سماها
مربوع اخر
قصبة و سيدا منح كبرته وحشاها
جدية بالرغام قناصها ما اتلقاها
شيكة ال من مصر جاتو الجريدة قراها
ممنوعة البدور الدولة اتولاها
س:ماذا قلتم فى الفيضان؟
ج:السنة دى البحر عامل عجيبة خلاص
وفيضان جاهو فايض كسر التراس
واتحدى القوانين فوق بيوت الناس
مرقو العدة برة اويجرو يا خلاص
اكيد بخرف العاوله سقا اليباس
اولو ضره لاكين اخرو رحمه ناس
مربوع اخر
السنة دى البحر لاقانا بالكيعان
واتحدى القوانين فوق سنة فيضان
يكسر فى المدينة وغلب الخزان
بى فتاقه قرب حلة الحران
الباعوضه تترس والمدير تعبان
بى عند السروراب فره بى الوديان
فى العوضاب محمل ومن كروهو ملان
هابش فى الكواهلة مبوظ الدكان
خلا النادى خلا التقول ميدان
بى عند الزبيراب يبمو مو شبهان
والسما كبالا فوق البلد مطران
والقش للجمال اضرب مع الكيعان
داير زول متيقر عقلو مو لهفان
مالى وشيهو مبسوط من ابل لى ضان
يعمل تايه فى القول ويسقى بى النيسان
س:عرفت ان لك كتابات عن الحكومة فماذا قلت:-
جات الثورة نزعت مننا الاحزاب
وياداب عينا نامت والضمير لى طاب
دايرين الشجاعة تكون كبار وشباب
نطبق شريعة الله نكون احباب
ما خلقونا فوق الدنيا لى اكل شراب
مخلوق للعبادة عشان ورانا حساب
هديك الجنة عينك ليها فاتحة الباب
بصدوك منها اكان العمل ما طاب
مربوع اخر
جات الثورة مرقت مننا الوسواس
الانقاذ حبابو الفيهو راحة الناس
عاوزين الشريعة الصافية بى اخلاص
تسكن فى الضمير جوا الدماغ والراس
ما خلقونا نخدم نجمع القراش
مخلوق للعبادة عشان ورانا قصاص
ديك الجنة بابا كبير مو قراش
بصدوك منها كان غاشك الوسواس
س: لك عدد كبير من الاغانى فاختم لنا باغنية من اغانيك؟
ج: يالله الخلقتا الكون و رازق الحى
برفع ايديا ليكا وانت تقبل لى
ازور قبر الرسول دابن عميرى حى
يا مولانا دنيا واخره تغفر لى
المحرر:
الشكر اكثره للشاعر ابو حميده مجدد ونسال الله ان يغفر
له ويغفر لنا
جميعا و يمن علينا بزيارة قبر المصطفى صلى الله عليه وسلم(قولوا امييييييييييييييييييييييييييييييييييييييييييييين)